Bakı Fond Birjası biznes liderləri ilə görüş keçirib

7 dekabr 2023-cü il tarixində Bakı Fond Birjası, Unicapital İnvestisiya Şirkəti ilə birlikdə Azərbaycanda Amerika Ticarət Palatasının (AmCham) üzvləri üçün “BAKU IPO SESSION 2023” tədbirini təşkil edib.

Müxtəlif sənaye mütəxəssisləri, investorlar və digər maraqlı tərəflərin bir araya gəldiyi tədbirdə, Azərbaycanda kapital bazarının inkişafı və IPO (İnitial Public Offer – İlkin Kütləvi Təklif) imkanları ilə bağlı ətraflı müzakirələr aparılıb.

“BAKU IPO SESSION 2023”də Bakı Fond Birjasının Müşahidə Şurasının sədri Fərid Axundov, Unicapital İnvestisiya Şirkətinin baş direktoru Vüqar Namazov,  TAB Qida & Atakey idarə heyətinin üzvü Furkan Ünal və OMG Capital Advisors-un sədri və baş direktoru Murat Gülkan məruzəçi qismində çıxış ediblər.

Tədbirin gündəliyi kapital bazarının inkişafı, dövlət qiymətli kağızlar bazarından maliyyələşdirmənin əsas aspektləri, Azərbaycanın kapital bazarlarında mühüm mərhələlər və imkanlar daxil olmaqla bir sıra mövzuları əhatə edib.

Bakı Fond Birjasının Müşahidə Şurasının sədri Fərid Axundov tədbirin açılışında qeyd edib ki, Azərbaycandakı genişmiqyaslı layihələrin maliyyələşdirilməsində dövlət sərmayələri və dövlət müəssisələri müstəsna rol oynayır. Bizim fikrimizcə Azərbaycanın iqtisadi inkişafının növbəti mərhələsində davamlı inkişafını təmin etmək və yeni sərmayələrin cəlb olunması prosesində özəl kapitalın da aktiv şəkildə təmsil olunması vacibdir.

Məhz bu səbəbdən Bakı Fond Birjası kapital bazarı iştirakçılarının potensialının gücləndirilməsi, onların genişmiqyaslı layihələrdə daha aktiv rol oynaması üçün strategiyanın hazırlanması mərhələsindədir. Bu strategiyanın əsas prioritetləri potensial yeni emitentlərin cəlb edilməsi və inkişafı, institusional və fərdi investorların prosesə qoşulması üçün şəraitin yaradılması, regional və beynəlxalq əməkdaşlığın gücləndirilməsi, sektor üçün kadrların yetişdirilməsi və ən yaxşı xarici təcrübədən bəhrələnilməsidir.

Türkiyənin “fast food” sektorunun liderlərindən biri olan və Türkiyədə “Burger King”, “Sbarro”, “Popeyes” və digər məhşur iaşə markalarının 1.500-dən çox restoranlarına sahib olan “TAB Gıda” şirkətinin idarə heyətinin üzvü Furkan Ünal özəl kapitalın biznesin inkişafına təsiri haqqında təqdimatla çıxış edib.

Türkiyədə sərmayələrin idarə olunması və maliyyə planamasına dair məsləhət xitmətləri göstərən “OMGCapital Advisors” şirkətinin İdarə Heyətinin Sədri və Baş İcraçı Direktoru Murat Gülkan Türkiyə bazarında özəl kapitalın mühüm rolundan bəhs edib.

Görüşün sonunda geniş müzakirələrə yer verilərək iştirakçıları maraqlandıran suallar cavablandırılıb.