Bakı Fond Birjasının fəaliyyətinə hansı xidmətlər daxildir?
Bakı Fond Birjası qiymətli kağızların kütləvi ticarəti üçün zəruri şərait təmin etməklə tənzimlənən bazarların təşkili və idarə edilməsi xidmətlərini göstərir. Bakı Fond Birjasının vəzifələri Qiymətli kağızlar bazarı haqqında Azərbaycan Respublikasının qanunu ilə tənzimlənir.
Bakı Fond Birjasında qiymətli kağızların ticarəti hansı qaydalar əsasında təşkil olunur ?
Bakı Fond Birjasında qiymətli kağızların ticarəti Qiymətli kağızlar bazarı haqqında Azərbaycan Respublikasının qanunu, Birjanın daxili qaydaları və digər əlaqəli normativ hüquqi aktlara əsasən tənzimlənir.
Bakı Fond Birjasında ticarətdə kimlər iştirak edə bilər ?
Bakı Fond Birjasında fiziki şəxslər və hüquqi şəxslər birja üzvləri vasitəsi ilə ticarətdə iştirak edə bilərlər.
Fiziki şəxslər Bakı Fond birjasında ticarətdə birbaşa iştirak edə bilərmi ?
Xeyr, fiziki şəxslər istisnasız olaraq yalnız birja üzvləri vasitəsilə ilə ticarətdə iştirak edə bilərlər.
Birja üzvləri kimlər ola bilər ?
Qiymətli kağızlar haqqında qanuna əsasən yalnız investisiya şirkəti lisenziyasına malik, BFB-nin üzvlük qaydalarının tələblərinə cavab verən hüquqi şəxslər birja üzv ola bilər. Hazırda BFB-nin 10 üzvü vardır
Fiziki şəxslər birja üzvlüyünə qəbul oluna bilərmi ?
Xeyr.,yalnız investisiya şirkəti lisenziyasına malik hüquqi şəxslər üzvlük üçün müraciət edə bilər və ya üzv ola bilər.
Xarici investisiya şirkətləri birjada üzvlüyə qəbul edilə bilərmi ?
Xarici hüquqi şəxs Azərbaycanda qeydiyyatdan keçmiş nümayəndəliyi olduğu təqdirdə BFB-nin üzvlük qaydalarına uyğun olaraq üzvlüyə qəbul edilə bilər.
Bakı Fond Birjasında hansı qiymətli kağızlar ticarət olunur ?
Açıq səhmdar cəmiyyətlərinin adi və imtiyazlı səhmləri, hüquqi şəxslər tərəfindən buraxılan korporativ istiqrazları, dövlət istiqrazları, notlar, valyuta və əmtəə əsaslı törəmə maliyyə alətləri ticarət olunur
Hansı qiymətli kağızlar birjada ticarət olunmur ?
Qapalı tipli səhmdar cəmiyyətinin səhmləri, vauçerlər, orderlər, valyuta
Mən Birjadan qızıl ala bilərəmmi ?
Xeyr, Bakı Fond Birjası yalnız qiymətli kağızların ticarəti təşkil edir.
Birjada istiqraz və ya səhm almaq üçün nə etmək lazımdır?
Birjada qiymətli kağızlarla (səhm və ya istiqraz) ticarət etmək istəyən şəxslər birja üzvlərinə müraciət etməlidir. Birja üzvü müştərisinin adından ticarət sistemində sifarişlər elan etmək və əqd bağlamaq hüquqna malikdir. Birja üzvlərinin siyahısı ilə bu keçiddən tanış ola bilərsiniz. <a href="https://bfb.az/uzvlerin-siyahisi/" title="https://bfb.az/uzvlerin-siyahisi/">https://bfb.az/uzvlerin-siyahisi/</a>
Hansı qiymətli kağızların yerləşdirilməsi birjada həyata keçirilir ?
Yalnız emissiya prospektinə əsasən kütləvi təklif üsulu ilə yerləşdirilməli olan qiymətli kağızların yerləşdirilməsi Birjada həyata keçirilir.
Birjada ticarət olunan qiymətli kağızlar və onların cari qiymətləri haqqında məlumatı necə əldə etmək olar?
Bakı Fond Birjasının rəsmi internet səhifəsində gündəlik açıqlanan, Əqdlər və Kotirovklar bölməsində yerləşdirilən cədvəldə qiymətli kazğızların son ticarət olunduqları tarixə uyğun qiymətləri ilə tanış ola bilərsiniz. Qiymətli kağızın cari qiyməti son ticarət olunduğu tarixin istinad qiymətindən 20% aşağı və yuxarı olmaqla dəyişə bilər.
Klirinq və hesablaşmaların aparılması əməliyyatları nədir ?
Klirinq və hesablaşmalar qiymətli kağızlar üzrə əqdlərin reallaşması üçün əqdin bağlanılmasından sonra (post-treyd) yerinə yetirilməsi zəruri olan proseslərdir.
BFB-nin ticarət platformasından istifadə olunaraq bağlanılmış əqdlərin klirinq və hesablaşmaları BFB tərəfindən aparılır ?
Xeyr, klirinq və Hesablaşmalar bu fəaliyyət növünə malik peşəkar bazar iştirakçısı olan Milli Depozit Mərkəzi tərəfindən aparılır.
BFB-də ticarət nə zaman keçirilir?
Ticarət reqlamentinə əsasən ticarət sesiyyasının saatları bazarlar üzrə dəyişə bilər. Daha ətraflı qeyd olunan linkdən keçid edə bilərsiniz. <a href="https://bfb.az/ticaret-saatlari/" title="https://bfb.az/ticaret-saatlari/">https://bfb.az/ticaret-saatlari/</a>
BFB-də ticarət hansı valyutada aparılır
Səhmlərlə ticarət yalnız manatla, korporativ istiqrazlarla əməliyyatlar isə istiqrazın buraxıldığı valyutadan asılı olaraq dollar, manat və ya avroda aparıla bilər.
Bakı Fond Birjasında valyutaların mübadiləsi mümkündürmü?
Xeyr. Bakı Fond Birjası yalnız fond birjası fəaliyyəti çərçivəsində qiymətli kağızların ticarətini təşkil edir.
Müəyyən məbləğdə yığılmış pul vəsaitim var. Birjada hansı növ və hansı emitentin qiymətli kağızlarına investisiya edə bilərəm ?
Bakı Fond Birjası ticarətin təşkilatçısı rolunda çıxış edir və Qiymətli kağızlar haqqında qanuna əsasən heç bir halda bazar iştirakçılarına investisiya məsləhəti verə bilməz.
Səhm və ya istiqrazını Birjada ticarətə çıxarmaq üçün emitent nə etməlidir ?
Qiymətli kağızlarını Birjada ticarətə buraxmaq istəyən emitentlər ilk növbədə listinq üçün Birjaya müraciət etməlidir. Qiymətli kağızlar müvafiq bazar seqmentində listinqə alındıqdan sonra Birjada ticarətə buraxıla bilər.
